UNEC nəzdində Qida Sənayesi Kollecinin kollektivi "Nur” uşaq evində olub

Ətraflı: Nəşr edilib 16-03-2023 15:47; Baxış sayı: 793

Sevgi, qayğı, diqqət və valideyn nəvazişindən məhrum olan körpə balalar. UNEC nəzdində Qida Sənayesi Kollecinin Tərbiyə işləri üzrə direktor müavini Sevinc Həmzəyevanın rəhbərliyi ilə kollecin Tədris hissə müdiri Samirə Hacıyeva, 10 qrup rəhbəri və qrup tələbələri "Nur” uşaq evindəki valideyn himayəsindən məhrum olan uşaqların görüşünə gediblər.

Onlar ehtiyac duyulan ərzaq və qidayla uşaqları təmin ediblər. Bir günlərini müxtəlif yaş qruplarında olan uşaqlara həsr edərək onların kövrək qəlblərini sevindiriblər. Novruz bayramının bəzəyi olan Kosa və Keçəl uşaqlarla oyunlar keçirmiş, hədiyyələr təqdim ediblər.

Bildirilib ki, yerə-göyə sığmayan sevgiyə layiq olan körpələrə diqqət və qayğı göstərmək hər birimizin borcudur. Azərbaycanın I vitse-prezidenti Mehriban Əliyeva xüsusi qayğıya ehtiyacı olan, valideyn himayəsindən məhrum olan uşaqlara daim diqqət və qayğı ilə yanaşmış, bu nəcib missiyası ilə bütün Azərbaycan uşaqlarının ən böyük dostu və ən böyük himayədarı olmuşdur. Azərbaycan uşaqlarına qayğı bu gün də diqqət mərkəzindədir. Prezident İlham Əliyev uşaqların sağlam və firavan böyüməsini, onların rifahının yüksəldilməsini dövlət siyasətinin başlıca vəzifələrindən biri kimi müəyyən edib. Onun Sərəncamı ilə 2009-cu ilin “Uşaq ili” elan edilməsi də bu sahəyə diqqətdən xəbər verir. Bu həm də onu göstərir ki, Azərbaycan dövləti uşaqların sabahı üçün böyük tədbirlər görür.