UNEC nəzdində Qida Sənayesi Kollecinin tələbələri üçün “Ulduz” Şokolad Fabrikinə ekskursiya təşkil olunub. Bu ekskursiya onlara real istehsalat mühitini görmək, sənaye prosesləri ilə yaxından tanış olmaq və biliklərini genişləndirmək imkanı yaratdı.

“Ulduz” Şokolad Fabriki 2001-ci ildən fəaliyyət göstərir və bu gün Qafqazın ən iri və yüksək keyfiyyətli qənnadı məhsulları istehsalçılarından biridir. Fabrik müasir texnologiyalarla təchiz olunub və burada istehsal olunan şokoladlar, karamel, vafli və digər qənnadı məmulatları yalnız yerli bazarda deyil, Avropa və Asiyanın 20-dən çox ölkəsinə ixrac olunur.

Fabrikdə tələbələr istehsal xəttində məhsulların hansı texnoloji proseslərdən keçdiyini izlədilər. Xammalın emalı, qarışdırılması, formalaşdırılması, temperatur rejimlərinə uyğun bişirilməsi və soyudulması kimi vacib mərhələlər tələbələrin marağına səbəb oldu. Onlar şokoladın temperlənməsi, karamellərin və drajelərin örtük prosesləri və vafli qatlarının hazırlanma texnologiyasını praktik nümunələrlə müşahidə etdilər. Fabrikin texnoloqu tələbələrə bütün bu prosesləri ətraflı izah etdi və onların suallarına cavab verdi.

Fabrik əməkdaşları tələbələrə gigiyena və qida təhlükəsizliyi standartlarının necə qorunduğunu ətraflı izah etdilər. Onlar istehsal sahəsində sanitariya qaydalarına ciddi əməl edildiyini, avadanlıqların daim dezinfeksiya olunduğunu və işçilərin xüsusi geyim qaydalarına riayət etdiyini müşahidə etdilər. Tələbələr həmçinin müxtəlif mərhələlərdə aparılan keyfiyyət nəzarəti prosedurlarını izlədilər, məhsulların beynəlxalq standartlara uyğun istehsal olunmasını təmin edən əsas prosesləri gördülər.

Bu ekskursiya tələbələr üçün fabrikdə tətbiq olunan texnologiyaları yerində öyrənmək və istehsal proseslərini real şəraitdə görmək baxımından çox faydalı oldu. Onlar məhsulların keyfiyyət və təhlükəsizliyinin təmin olunmasının nə qədər mühüm və detallı bir proses olduğunu daha yaxşı anladılar. Tələbələr texnoloqla interaktiv müzakirələr apararaq istehsal prosesləri və keyfiyyət standartları ilə bağlı biliklərini daha da artırdılar.

---